AYAJỌ AWỌN AKỌROYIN LAGBAYE: EYI LAWỌN AKỌROYIN TO PADANU ẸMI WỌN LỌDUN 2018

O kere tan, akọroyin marundinlọgọrun lo padanu ẹmi wọn lẹnu iṣẹ lọdun to kọja lẹnu, gẹgẹ bii ajọ awọn akọroyin lagbayee (IFJ) ṣe sọ.

Iye awọn to ku ju ti ọdun 2017, ṣugbọn ko to ti awọn ọdun ti tẹlẹ nigba ti ogun Iraq ati Syria n gbona janjan.

Iku akọroyin to pọ ju ṣẹlẹ ni ọdun 2006 nigba ti marundinlọgọjọ ku.

Awọn iye wọnyi da lori ẹnikẹni to n ṣiṣẹ pẹlu ile iroyin.

Iku akọroyin kan ni ọdun 2018 to ya gbogbo aye lẹnu ni ti ọmọ Saudi Arabia, Jamal Khashoggi.

Oṣu kẹwaa ọdun naa lo padanu ẹmi rẹ nigba to lọ ileeṣẹ aṣoju orilẹede Saudi ni Turkey.

Iku akọroyin naa si mu ọpọlọpọ ibinu wa laarin Saudi ati Turkey. Ọpọlọpọ eniyan ni agbaye si bẹnu atẹ lu.

Ni oṣu to lọ ni ilẹ Gẹẹsi, akọroyin kan Lyra Mckee ku nigba ti jagidijagan bẹ silẹ nibi ifẹhonu han kan ni Londonderry.

Ọmọ ẹgbẹ agbebọn kan jẹwọ pe oun lo pa akọroyin naa.

Ibo lo buru ju fun awọn akọroyin?

Afghanistan ṣi ni orilẹede to buru ju fun awọn akọroyin. Mẹrindinlogun lo ku nibẹ ni ọdun to kọja.

Akọroyin mẹsan lo ku ni iṣẹlẹ kan ṣoṣo ni Kabul, lẹyin ti wọn lọ kọ iroyin nibi ti ado oloro kan ti bu gbamu.

Wọn ko mọ wipe ẹṣin-ò-kọkú kan to to ado oloro mọra ti darapọ mọ wọn bi pe akọroyin naa ni oun.

Ni apa ila-oorun Afghanistan, akọroyin BBC, Ahmad Shah ku ninu awọn ikọlu to waye ni agbegbe Khost.

Bakan naa ni awọn akọroyin ku ni orilẹede Amẹrika naa pẹlu.

Wọn yinbọn pa marun un nigba ti awọn agbebọn ṣe ikọlu si iwe iroyin Capital Gazette ni Mariland. Arakunrin kan to ti gbiyanju lati gbe iwe iroyin naa lọ ile ẹjọ tẹlẹ ri lo ṣe ikọlu naa.

Ajọ IFJ ni awọn ti wọn ko le fara da awọn oun to wa ninu iroyin, pẹlu iwa jẹgudujẹra lo n fa ti awọn akọroyin fi wa ninu ewu.

Ni ọdọọdun, ajọ to n ja fun aabo awọn akọroyin ni agbaye maa n ya aworan awọn akọroyin to wa ni ahamọ ni ipari ọdọọdun.

Awọn orilẹede to ni akọroyin to pọju ni agbaye ree ni ọdun 2018:

    Turkey - 68

    China - 47

    Egypt - 25

    Saudi Arabia and Eritrea - 16

Iṣẹ iroyin ati ijọba awa-arawa

Ajọ Iṣọkan agbaye (UN) ti tan ina soju ọrọ ipa nla ti awọn oniroyin n ko ninu ijọba awa-arawa, paapaa nigba idibo.

Adari ajọ naa, Antonio Guterres, sọ ninu atẹjade kan wipe ijọba awa-arawa ko le muna doko ti ko ba si iroyin ti ko labawọn.

Courtney Radsch lati ajọ to n ja fun aabo awọn akọroyin ni ọrọ gbigbogun ti awọn akọroyin pẹlu ọrọ ẹnu ti wa wọpọ bayii, paapaa ni orilẹede Philippines ati Amerika.

- BBC