EEYAN MEJILA PADANU ẸMI WỌN SINU IJAMBA MỌTO L’ABẸOKUTA

Bọsun Ọlaniyi, Abẹokuta

Ṣe lawọn eeyan kawọ mọri, ti wọn sunkun ikunlẹ abiyamọ lọjọ Sande ana nigba ti ijamba mọto fẹmi eeyan ti ko din ni mejila ṣofo danu lagbegbe Ṣiun, lopopona Abẹokuta siluu Ṣagamu.

Ohun ta a gbọ ni pe ni nnkan bi aago kan ọsan geerege ni taya mọto ayọkẹlẹ KIA SERATO kan wa lori ere deede fọ danu, ti awakọ naa si n gbiyanju lati da a duro lojiji, to si mu ki mọto naa sọda sodikeji lọọ kọlu bọọsi ati ọkọ ayọkẹlẹ min in to n bọ.

A gbọ pe opopona  Ṣagamu ni mọto KIA SERATO ti wọn loo ko eeyan mẹta ti n bọ, bo si ṣe e de agbegbe Ṣiun nijamba naa ṣẹlẹ, ta a gbọ pe o sọda lọọ kọlu awọn mọto to n bọ lati Abẹokuta.

Ijamba naa pọ debi pe awọn mejila, to fi mọ awakọ mọto ayọkẹlẹ mejeeji ni wọn padanu ẹmi wọn, atawọn ọmọ kekere.

Awọn ẹṣọ oju popona, TRACE ati FRSC  la gbọ pe wọn palẹmọ awọn oku naa lọ si mọṣuari, ti wọn si gbe awọn to farapa lọ si yara ti wọn ti n tọju awọn to niṣẹlẹ pajawiri fun itọju, iyẹn ti Ọlabisi Ọnabanjọ to wa niluu Ṣagamu.